الهوى يخرب مصانع

الهوى يخرب مصانع عالية والجبر يبنيها
يامحب قلبي تراجع رد نفسك من مهاويها
والهيانه لا تجي فيها قبل لا تهتان
من دخل في بحر ما بلد وقايس قياسه شله الطوفان

من زمن حاسبك نافع لا تعكت باتبتيها
انا ماحسبتك باتتابع بعض شي واشياء باتخليها
تنكر الجوده وتنسيها والزمن لي كان
من دخل في بحر ما بلد وقايس قياسه شله الطوفان

اصبح المعروف ضائع والكلم محد يوفيها
والاماين والودائع لاهلها محد يوديها
هكذا الايام تاليها من تامن خان
من دخل في بحر ما بلد وقايس قياسه شله الطوفان

ماتجي عينه الاصابع ماستوت لو باتساويها
وانته شف عادك وطالع خذ من الكلمه معانيها
بعض وقتك بايكفيها لانت صدق انسان
من دخل في بحر ما بلد وقايس قياسه شله الطوفان

بدل الوقت الطبائع والبصائر كاد يعميها
من سمع كلمه تصاقع او سكت ماطاع يحكيها
الشهاده حد يخفيها ضعف في الايمان
من دخل في بحر ما بلد وقايس قياسه شله الطوفان

ربي لاتخلي المرابع اعمر الديره باهليها
والمجالس والمجامع والكواكب ذي تسريها
خلها تجري مجاريها لا تخرب شان
من دخل في بحر ما بلد وقايس قياسه شله الطوفان
(المحضار)